Автор: Hnotubrjóturinn í MÍR
Ívar H. Jónsson fæddist í Reykjavík 1927. Hann lauk stúdentsprófi frá MR 1947 og útskrifaðist frá lagadeild HÍ 1953. Hann var blaðamaður á Þjóðviljanum og ritstjóri. Ívar varð síðar skrifstofustjóri Þjóðleikhússins og fjármálastjóri. Hann var einn stofnenda MÍR og hefur verið formaður félagsins frá 1974. Ívar er kvæntur Ragnhildi Rósu Þórarinsdóttur kennara og eiga þau tvö börn.
Félagið MÍR, menningartengsl Íslands og Rússlands er til húsa að Hverfisgötu 105. Félagið stendur fyrir kvikmyndasýningum á sunnudögum og verður síðasta sýning á þessu ári þriðja sunnudag í aðventu.Ívar H. Jónsson er formaður félagsins, og segir frá: „Í haust höfum við einkum sýnt stríðsmyndir í tilefni af því að liðin eru 65 ár frá orrustunni um Stalíngrad, sem olli straumhvörfum í átökum seinni heimsstyrjaldarinnar,“ segir Ívar. „Nú þegar styttist í jólin er eðlilegra að sýna efni af öðrum toga. Síðastliðinn sunnudag var sýnd kvikmynd um örlagaríkan tíma í ævi ballettdansarans Vaslav Nizhinskij, en hinn 16. desember sýnum við svo hinn sívinsæla ballett Hnotubrjótinn við tónlist Tsjaíkovskíjs í flutningi listamanna Bolshoi-leikhússins.“Félagið MÍR var stofnað í marsmánuði 1950 til að efla menningartengsl þjóða Íslands og Ráðsstjórnarríkjanna þáverandi. „Að stofnun félagsins stóðu margir málsmetandi menntamenn, og voru í broddi fylkingar þeir Halldór Laxness, Þórbergur Þórðarson og Kristinn E. Andrésson,“ segir Ívar. „Félagið stendur í dag fyrir áhugaverðri menningardagskrá, sýningum myndefnis af ýmsu tagi og samkomum, og í haust var m.a. haldinn umræðufundur um rússnesk stjórnmál með sendiherra Rússlands á Íslandi, og tvö skáldakvöld í nóvember, um Alexander Púshkín annars vegar og rússneskan vísindaskáldskap hins vegar.“Félagið á einnig allveglegt bókasafn, með nokkrum þúsundum binda bóka: „Þar er m.a. að finna öndvegisverk jöfra rússneskra bókmennta, sem og verk nýrri höfunda, bæði á rússnesku og í enskum og íslenskum þýðingum. Safnið á einnig ágætt úrval af pólitískum bókum, s.s. um Lenín, marxisma, sósíalisma og kommúnisma,“ segir Ívar.Félagið er öllum opið og vel tekið á móti gestum: „Heimsókn í félagið getur opnað dyr að þeim mikla og litríka menningarheimi sem Rússland býr að, en saga landsins státar af ótrúlegum fjölda mikilla snillinga á öllum sviðum lista.“Kvikmyndasýningar MÍR hefjast kl. 15 og er aðgangur ókeypis. Í sýningarhléi má kaupa léttar kaffiveitingar.Nánari upplýsingar eru á www.mmedia.is/felmir.
